દેશમાં સોના અને ચાંદીના ભાવમાં સતત તેજીનો માહોલ જોવા મળી રહ્યો છે. શુક્રવાર, 3 જુલાઈ 2026ના રોજ સોનાના ભાવમાં ફરી વધારો નોંધાતા ખરીદદારોમાં ચિંતા વધી છે. આંતરરાષ્ટ્રીય બજારમાં મજબૂત ટ્રેન્ડ, ડોલરની નબળાઈ અને તાજેતરમાં સોના પર વધારાયેલી આયાત ડ્યુટીના કારણે કિંમતી ધાતુઓના ભાવ સતત ઊંચા જઈ રહ્યા છે.
રાજધાની દિલ્હીમાં 24 કેરેટ સોનાનો ભાવ પ્રતિ 10 ગ્રામ ₹1,43,940 નોંધાયો છે, જ્યારે 22 કેરેટ સોનાનો ભાવ ₹1,31,960 રહ્યો છે. એક દિવસ અગાઉ દિલ્હીના બુલિયન માર્કેટમાં 99.9 ટકા શુદ્ધ સોનાનો ભાવ ₹3,000ના વધારા સાથે ₹1,47,500 પ્રતિ 10 ગ્રામ સુધી પહોંચ્યો હતો.
મુંબઈ, ચેન્નાઈ અને કોલકાતામાં 22 કેરેટ સોનાનો ભાવ પ્રતિ 10 ગ્રામ ₹1,32,810 અને 24 કેરેટ સોનાનો ભાવ ₹1,43,790 નોંધાયો છે. બીજી તરફ અમદાવાદ, સુરત, રાજકોટ અને વડોદરા સહિત ગુજરાતના મુખ્ય શહેરોમાં 22 કેરેટ સોનાનો ભાવ ₹1,31,860 પ્રતિ 10 ગ્રામ અને 24 કેરેટ સોનાનો ભાવ ₹1,43,840 પ્રતિ 10 ગ્રામ રહ્યો છે.
સોનાની સાથે ચાંદીના ભાવમાં પણ સતત વધારો યથાવત રહ્યો છે. આજે ચાંદીનો ભાવ ₹2,45,100 પ્રતિ કિલોગ્રામ સુધી પહોંચી ગયો છે. આંતરરાષ્ટ્રીય બજારમાં હાજર ચાંદીનો ભાવ 61.28 ડોલર પ્રતિ ઔંસ નોંધાયો છે. ઔદ્યોગિક માંગ તેમજ રોકાણકારોની વધતી ખરીદીના કારણે ચાંદીના ભાવને વધુ ટેકો મળી રહ્યો છે.
બજાર નિષ્ણાતોના જણાવ્યા મુજબ સોના પર આયાત ડ્યુટીમાં થયેલા તાજેતરના વધારાની સીધી અસર સ્થાનિક બજારમાં જોવા મળી રહી છે. જેમ એન્ડ જ્વેલરી એક્સપોર્ટ પ્રમોશન કાઉન્સિલનું માનવું છે કે આયાત ડ્યુટી વધારવાથી સોનાની આયાતમાં ઘટાડો થતો નથી, પરંતુ તેની કિંમતમાં વધારો થાય છે. બીજી તરફ જ્વેલરી વેપારીઓનું કહેવું છે કે આયાત ડ્યુટી વધારવા કરતાં આયાતના જથ્થા પર નિયંત્રણ વધુ અસરકારક પગલું બની શકે છે.
નિષ્ણાતોના મતે વૈશ્વિક આર્થિક અનિશ્ચિતતા, ડોલરની નબળાઈ અને સુરક્ષિત રોકાણ તરીકે સોનાની વધતી માંગને કારણે આગામી દિવસોમાં પણ કિંમતી ધાતુઓના ભાવમાં અસ્થિરતા અને તેજી યથાવત રહેવાની શક્યતા છે.
Reporter: admin
