દિલ્હીના શાહદરા રેલવે સ્ટેશન પર પ્લેટફોર્મ નંબર-3 પર એક ગંભીર ઘટના બની છે. યોગા એક્સપ્રેસની જનરલ બોગીમાં સીટ મેળવવા મુદ્દે મુસાફરો વચ્ચે થયેલો વિવાદ અચાનક ઉગ્ર બની ગયો અને એક મુસાફરનું મોત થયું હોવાનું જાણવા મળ્યું છે.

પ્રાથમિક માહિતી મુજબ, ટ્રેન આવતાં જ જનરલ કોચમાં ચઢવા માટે મુસાફરો વચ્ચે ધક્કામુક્કી અને ઝઘડો શરૂ થયો હતો. આ દરમિયાન મામલો એટલો બગડી ગયો કે એક મુસાફર પર હુમલો થયો અને તે ગંભીર રીતે ઘાયલ થયો. ત્યારબાદ તેને બચાવી શકાયો નહોતો

ઘટનાસ્થળે હાજર અન્ય મુસાફરો અને કેટલાક રેલવે સુરક્ષા દળ (RPF)ના કર્મચારીઓ હોવા છતાં સ્થિતિ કાબૂ બહાર ગઈ હોવાનું જણાવાઈ રહ્યું છે. ચોંકાવનારી વાત એ છે કે ઘટનાના સમયે ઘણા લોકો માત્ર જોતા રહ્યા અને તરત મદદ માટે આગળ આવ્યા નહીં.

આ સમગ્ર ઘટનાનો વીડિયો પણ સામે આવ્યો છે, જેમાં પ્લેટફોર્મ પર ભારે અફરાતફરી અને ઝઘડો સ્પષ્ટ રીતે જોવા મળે છે. ઘટનાએ રેલવે સ્ટેશનોની સુરક્ષા વ્યવસ્થા અને ભીડ નિયંત્રણ પર ગંભીર સવાલ ઊભા કર્યા છે.

પોલીસે કેસ નોંધીને તપાસ શરૂ કરી છે અને આરોપીઓની ઓળખ કરવાની કામગીરી ચાલુ છે. રેલવે પ્રશાસને પણ ઘટનાની આંતરિક તપાસના આદેશ આપ્યા છે.
આ ઘટના બાદ મુસાફરોની સુરક્ષા અને જનરલ કોચમાં વધતી ભીડને લઈને ફરી એકવાર ચિંતા વ્યક્ત કરવામાં આવી રહી છે.

Reporter: admin