કેન્દ્રીય શિક્ષણ મંત્રી ધર્મેન્દ્ર પ્રધાને રાજીનામું આપ્યા બાદ જંતર-મંતર ખાતે વિરોધ પ્રદર્શન કરી રહેલા CJPના પ્રમુખ અભિજીત દીપકે વિદ્યાર્થીઓને સંબોધ્યા હતા. તેમણે આ નિર્ણયને વિદ્યાર્થીઓની જીત ગણાવતા કહ્યું કે, "વિદ્યાર્થી એકતા જિંદાબાદ... અમે જીતી ગયા."

અભિજીત દીપકે કહ્યું કે ઘણા લોકો કહેતા હતા કે આ સરકારમાં કોઈ મંત્રી રાજીનામું આપતા નથી, પરંતુ વિદ્યાર્થીઓની એકતા અને સતત શાંતિપૂર્ણ આંદોલનના કારણે સરકારને નિર્ણય લેવો પડ્યો. તેમણે કહ્યું કે જો ડર્યા વગર પોતાની વાત મક્કમપણે રજૂ કરવામાં આવે તો સફળતા ચોક્કસ મળે છે.

તેમણે વધુમાં જણાવ્યું કે તેમની લડત હજુ પૂર્ણ થઈ નથી અને હવે પણ તેમની બે મહત્વપૂર્ણ માંગણીઓ બાકી છે. દીપકે પ્રતીકાત્મક રીતે કહ્યું, "અમે કોકરોચ છીએ, એકવાર અંદર ઘૂસી જઈએ તો સરળતાથી બહાર નીકળતા નથી." તેમના કહેવા મુજબ ધર્મેન્દ્ર પ્રધાનનું રાજીનામું એ વાતનો પુરાવો છે કે લોકશાહી પદ્ધતિથી ચલાવવામાં આવેલા આંદોલનો અસરકારક સાબિત થઈ શકે છે.

અભિજીત દીપકે ભારતના મુખ્ય ન્યાયાધીશ (CJI) સૂર્યકાંતનો પણ ઉલ્લેખ કરતાં કહ્યું કે, "હું તેમનો આભાર માનું છું. જો તેમણે અમને 'કોકરોચ' ન કહ્યા હોત, તો કદાચ આટલું મોટું જનસમર્થન ન મળત અને ધર્મેન્દ્ર પ્રધાન રાજીનામું ન આપત."

ધર્મેન્દ્ર પ્રધાનના રાજીનામા બાદ જંતર-મંતર પર વિદ્યાર્થીઓ અને સમર્થકોએ જીતની ઉજવણી કરી હતી. દીપકે આ ઘટનાને "લોકશાહીની જીત" ગણાવી અને જણાવ્યું કે હવે જવાબદારી નક્કી થયા બાદ શિક્ષણ વ્યવસ્થામાં જરૂરી સુધારાઓ તરફ આગળ વધવાનો સમય આવી ગયો છે.

Reporter: admin