મુખ્યમંત્રીશ્રીએ મુંબઈ ખાતે વાઈબ્રન્ટ ગુજરાત સમિટ ૨૦૨૭ ને અનુલક્ષીને ઉદ્યોગ જગતના વિવિધ ઉદ્યોગપતિઓ સાથે વન ટુ વન બેઠક કરી હતી.મુખ્યમંત્રીશ્રી સૌને વાઈબ્રન્ટ ગુજરાત સમિટ ૨૦૨૭ માં ભાગીદાર બનવા આહવાન કર્યું હતું.

ગુજરાતમાં રોકાણ અંગે દેશના ઉદ્યોગપતિઓએ વાઇબ્રન્ટ ગુજરાત સમિટમાં પોતાના અનુભવો અંગે શું કહ્યું તે જાણો..

ગુજરાતમાં ઇલેક્ટ્રિક વાહનોની તકો માટે ફળદાયી ચર્ચા થઇ: આનંદ મહિન્દ્રા

મહિન્દ્રા ગ્રુપના ઉદ્યોગપતિશ્રી આનંદ મહિન્દ્રાએ પોતાના અનુભવ શેર કરતા જણાવ્યું કે, ગુજરાતમાં રોકાણ અંગે પ્રથમવાર આ જ રૂમમાં તે સમયના ગુજરાતના મુખ્યમંત્રીશ્રી નરેન્દ્રભાઈ મોદી સાથે મિટિંગ થઈ હતી, ત્યારે તેમની દુરંદેશી જોઈને હું પ્રભાવિત થયો હતો. આજે મુખ્યમંત્રીશ્રી ભુપેન્દ્રભાઈ પટેલ સાથે ચર્ચા કરી ખૂબ જ ખુશી અનુભવું છું અને ગુજરાતમાં રોકાણ અંગે ભવિષ્યના પ્લાન અંગે આત્મીય સંવાદ કર્યો હતો. જેમાં ગુજરાતમાં EV (ઇલેક્ટ્રિક વાહનો) અને GIFT સિટી ક્ષેત્રે તકોની શોધ કરવા અંગે મહિન્દ્રા ગ્રુપ સાથે ફળદાયી ચર્ચાઓ કરવામાં આવી. રોકાણ, સહયોગ અને વિકાસ માટેના નવા માર્ગો તપાસવામાં આવ્યા, જેનાથી અગ્રણી રોકાણ સ્થળ તરીકે ગુજરાતનું સ્થાન વધુ મજબૂત બન્યું છે.

ગુજરાતની શિપિંગ પોલિસી ખૂબ જ સરાહનીય: નિખિલ મર્ચન્ટ

સ્વાન કોર્પોરેશનના એમડી શ્રી નિખિલ મર્ચન્ટે ગુજરાતમાં પોતાની કામગીરીના વિસ્તરણ અને આધુનિકીકરણની યોજનાઓ અંગે 'સ્વાન એનર્જી' (Swan Energy) સાથે ફળદાયી ચર્ચાઓ થઈ હોવાનું જણાવ્યું હતું. વધુમાં તેમણે કહ્યું કે, મુખ્યમંત્રીશ્રી સાથે કંપનીના વિકસતા જતા આંતરરાષ્ટ્રીય વ્યવસાયને ટેકો આપવા માટે બહેતર કનેક્ટિવિટી અને નજીકના એરપોર્ટ ઈન્ફ્રાસ્ટ્રક્ચરની જરૂરિયાત અંગે પણ ચર્ચા કરવામાં આવી. ગુજરાતની શિપિંગ પોલિસી ખૂબ જ સરાહનીય છે. ગુજરાત ઉદ્યોગ આધારિત વિકાસ અને રોકાણને પ્રોત્સાહન આપવા માટે પ્રતિબદ્ધ છે. 

રાજ્યના મજબૂત ટેક્સટાઇલ ઇકોસિસ્ટમ દ્વારા નવા રોકાણ અને વિસ્તરણ કરાશે: દીપાલી ગોએન્કા

વેલ્સપન ઇન્ડિયા લિ. ના સીઈઓ દીપાલી ગોએન્કા એ પોતાનો પ્રતિભાવ આપતા જણાવ્યું કે, 
વૈશ્વિક કાપડ ક્ષેત્રે ગુજરાતના નેતૃત્વને વધુ મજબૂત બનાવવા અંગે વેલ્સપન ગ્રુપ સાથે ફળદાયી ચર્ચાઓ થઈ હતી. રાજ્યના મજબૂત ટેક્સટાઇલ ઇકોસિસ્ટમ અને ઉદ્યોગ તરફી નીતિઓનો લાભ લઈને વિકાસ, નિકાસ અને રોજગારીને વેગ આપવા માટે ગુજરાતમાં નવા રોકાણ અને વિસ્તરણની તકો વિશે વિચારણા કરવામાં આવી હતી. 

ડિસેમ્બરમાં કોપર રિસાયક્લિંગ પ્લાન્ટનું ઉદ્ઘાટન કરવાની પણ ચર્ચા થઈ: સતિષ પાઇ

હિન્ડાલ્કો કંપનીના એમડી શ્રી સતિષ પાઈએ જણાવ્યું કે, ગુજરાતના ઔદ્યોગિક અને ઉત્પાદન ઇકોસિસ્ટમમાં વિપુલ તકો છે, જેમાં કોપર રિસાયક્લિંગ, ઇ-વેસ્ટ મેનેજમેન્ટ અને સર્કુલર ઇકોનોમી પહેલનો સમાવેશ થાય છે, તેની ચર્ચા કરવા માટે હિન્ડાલ્કોના નેતૃત્વ સાથે રચનાત્મક બેઠક યોજાઈ હતી. ડિસેમ્બરમાં કોપર રિસાયક્લિંગ પ્લાન્ટનું ઉદ્ઘાટન કરવાની પણ ચર્ચા થઈ હતી. સંભવિત રોકાણો, ટકાઉ ઔદ્યોગિક પદ્ધતિઓ અને અગ્રણી કોપર ડેસ્ટિનેશન તરીકે ગુજરાતની સ્થિતિને મજબૂત બનાવવાના માર્ગો પર પણ ચર્ચા થઈ હતી. 

કંપની ગુજરાતમાં 25 મિલિયન ટનની ક્ષમતા ધરાવતો વિશ્વનો સૌથી મોટો સ્ટીલ પ્લાન્ટ વિકસાવશે: શ્રી અમિત હરલાલકા

AMNSના સીઈઓ શ્રી અમિત હરલાલકા એ જણાવ્યું કે, ગુજરાતમાં AMNS ઈન્ડિયાની મહત્વાકાંક્ષી રોકાણ યોજનાઓ અંગે મુખ્યમંત્રીશ્રી સાથે ફળદાયી બેઠક યોજાઈ હતી. કંપની જૂન સુધીમાં રૂ. 80,000 કરોડનું રોકાણ પૂર્ણ કરવાની દિશામાં આગળ વધી રહી છે, તેમજ હજીરા ખાતે મુખ્યત્વે પુનઃપ્રાપ્ય ઊર્જા અને બેટરી સ્ટોરેજ ક્ષેત્રે વધારાના રૂ. 10,000 કરોડનું રોકાણ કરવાની યોજના ધરાવે છે. કંપનીએ ગુજરાતમાં 25 મિલિયન ટનની ક્ષમતા ધરાવતો વિશ્વનો સૌથી મોટો સ્ટીલ પ્લાન્ટ વિકસાવવાના પોતાના વિઝન વિશે પણ માહિતી આપી હતી.

Reporter: admin