તાજેતરમાં વડોદરા શહેર એસઓજી (SOG) દ્વારા ₹1 લાખથી વધુ કિંમતનો કોડીન સહિતનો માદક પદાર્થ ઝડપી પાડવામાં આવ્યો હતો, જે પોલીસની સક્રિય કામગીરીનું ઉદાહરણ છે. પોલીસ તંત્રનું માનવું છે કે નશાના વેપાર સામે સતત અને સંકલિત કાર્યવાહી દ્વારા શહેરમાં ડ્રગ્સ નેટવર્કને નાબૂદ કરી શકાય છે.

આગામી દિવસોમાં કામગીરીને વધુ અસરકારક બનાવવા માટે તમામ ડીસીપી, એસીપી અને પોલીસ ઇન્સ્પેક્ટરો માટે વિશેષ વર્કશોપનું આયોજન કરવામાં આવ્યું હતું. વર્કશોપ દરમિયાન એનડીપીએસ કાયદાની જોગવાઈઓ, સ્ટાન્ડર્ડ ઓપરેટિંગ પ્રોસિજર (SOP), તપાસની પદ્ધતિઓ અને ઓપરેશનલ સજ્જતા અંગે વિગતવાર માર્ગદર્શન આપવામાં આવ્યું હતું.

પોલીસ કમિશનરે જણાવ્યું હતું કે શહેરમાં ડ્રગ્સ સંબંધિત હોટસ્પોટ્સની ઓળખ કરીને ત્યાં વિશેષ નજર રાખવામાં આવશે અને ડ્રગ્સ નેટવર્ક સાથે સંકળાયેલા તત્વો સામે કડક કાયદેસરની કાર્યવાહી કરવામાં આવશે. "નશા મુક્ત વડોદરા" અભિયાનને સફળ બનાવવા માટે નાગરિકોને પણ માહિતી આપીને પોલીસને સહકાર આપવા અપીલ કરવામાં આવી છે.