શિમલા: હિમાચલ પ્રદેશના ચંબા જિલ્લામાં શનિવારે સવારે એક દર્દનાક માર્ગ અકસ્માતમાં સાત લોકોના મોત થયા છે, જ્યારે ૧૧ મુસાફરો ઈજાગ્રસ્ત થયા છે. બૈરાગઢથી ચંબા જઈ રહેલી ખાનગી બસ તીસા-બૈરાગઢ માર્ગ પર ચાલુજ વળાંક પાસે અનિયંત્રિત થઈને પલટી ગઈ અને નીચેના રસ્તા પર જઈ પડી. પોલીસ, એનડીઆરએફ, હોમગાર્ડ, અગ્નિશમન સેવા અને મહેસૂલ વિભાગની ટીમો રાહત-બચાવ કામગીરીમાં જોડાયેલી છે.

પોલીસ અધીક્ષક વિજય સકલાનીએ જણાવ્યું કે અકસ્માત સવારે લગભગ સવા સાત વાગ્યે થયો. ચુરાહ ખીણનો આ ૨૭ કિમી લાંબો પહાડી માર્ગ સાંકડો છે અને ઊંડી ખાઈઓ ધરાવે છે. મૃતકોમાં જગદેવ (૫૦), દેશ રાજ (૩૫), જહદેહી (૨૪), હરદેહી (૪૩), નીલમ (૩૪), બસ ચાલક રૂપ સિંહ અને પરિચાલક તેજ સિંહનો સમાવેશ થાય છે, જેઓ ચુરાહ વિસ્તારના રહેવાસી હતા. ૧૧ ઈજાગ્રસ્તોમાંથી છને ગંભીર ઈજાઓ થતાં તેમને ચંબાની મેડિકલ કોલેજ હોસ્પિટલમાં રીફર કરાયા છે.

Reporter: admin