શહેરમાંથી પાંચ વર્ષ બાદ કોલેરાના બે કેસ પોઝીટિવ મળી આવ્યા છે. જેના પગલે મળતી માહિતી મુજબ આણંદ શહેર અને તેના આસપાસના 10 કિલોમીટર વિસ્તારને કોલેરાગ્રસ્ત જાહેર કરવામાં આવ્યો છે. જેમાં આણંદ શહેરના બાલુપુરા અને તાસ્કંદ કુમારશાળાની નજીકના વિસ્તારમાંથી કોલેરા પોઝીટિવના બે કેસ મળી આવ્યા છે. જેથી જાહેર આરોગ્યની દૃષ્ટિએ સાવચેતીના પગલારુપે જિલ્લા આરોગ્ય અધિકારીએ કરેલ દરખાસ્તને ધ્યાને લઇને જિલ્લા મેજીસ્ટ્રેટ આણંદ શહેર અને આસપાસના વિસ્તારને કોલેરાગ્રસ્ત જાહેર કર્યું છે.
મળતી વિગતોમાં બાલુપરા અને તાસ્કંદ કુમારશાળા વિસ્તારમાંથી એક સાત વર્ષીય બાળકી અને 65 વર્ષીય મહિલાને ત્રણ દિવસ અગાઉ સારવાર અર્થ દાખલ કરવામાં આવ્યા હતા અને સેમ્પલ લેવામાં આવ્યા હતા. આજે તેઓનો કોલેરા પોઝિટીવ રિપોર્ટ આવતા આરોગ્ય વિભાગે સત્વરે સાવચેતીની કાર્યવાહી હાથ ધરી હતી. છેલ્લા બે દિવસમાં શહેરમાં ડાયેરીયાના 30થી વધુ કેસો નોંધાયા હોવાનું જાણવા મળે છે.
જેમાં મોટાભાગના દર્દીઓને ફુડ અને પાણીના કારણે સમસ્યા થઇ હોવાનું આરોગ્ય વિભાગનું માનવું છે. જેથી ખુલ્લેઆમ વેચાતા ખાણીપીણીનો ઉપયોગ ન કરવા સહિત શુદ્વ પાણી પીવા, સ્વચ્છતા જાળવવા અને શારીરિક તકલીફ જણાય તો તુરંત નજીકના દવાખાનાનો સંપર્ક સાધવા આરોગ્ય વિભાગ દ્વારા અપીલ કરવામાં આવી છે.
Reporter: News Plus
