રાષ્ટ્રીય સુરક્ષા સલાહકાર (NSA) અજિત ડોભાલને શનિવારે પુણે ખાતે લોકમાન્ય તિલક રાષ્ટ્રીય પુરસ્કાર 2026થી સન્માનિત કરવામાં આવ્યા. તિલક સ્મારક ટ્રસ્ટ દ્વારા આપવામાં આવતા આ પ્રતિષ્ઠિત પુરસ્કાર તેમને કેન્દ્રીય ગૃહમંત્રી અમિત શાહના હસ્તે અર્પણ કરવામાં આવ્યો. દેશની રાષ્ટ્રીય સુરક્ષા અને વ્યૂહાત્મક ક્ષેત્રમાં તેમના લાંબા સમયથી આપેલા મહત્વપૂર્ણ યોગદાનને ધ્યાનમાં રાખીને તેમને આ સન્માન આપવામાં આવ્યું છે.

સન્માન સમારોહ દરમિયાન અજિત ડોભાલે દેશના યુવાનોને રાષ્ટ્રહિતને સર્વોચ્ચ સ્થાન આપવા અપીલ કરી હતી. તેમણે જણાવ્યું કે યુવાનોને વ્યક્તિગત લાભ અને નાના સ્વાર્થથી ઉપર ઉઠીને રાષ્ટ્ર નિર્માણ માટે પોતાનું જીવન સમર્પિત કરવું જોઈએ. તેમણે કહ્યું કે જો ભારતને વધુ મજબૂત અને વિકસિત બનાવવું હોય તો દરેક નાગરિકે, ખાસ કરીને યુવાનોને, પોતાના કર્તવ્ય પ્રત્યે નિષ્ઠા અને સમર્પણ સાથે કાર્ય કરવું જરૂરી છે.

અજિત ડોભાલે વધુમાં જણાવ્યું કે રાષ્ટ્રસેવા માત્ર સરહદ પર તૈનાત જવાનોની જવાબદારી નથી, પરંતુ દરેક નાગરિકનું કર્તવ્ય છે. તેમણે યુવાનોને સંકલ્પ લેવા અપીલ કરી કે તેઓ પોતાના જીવનમાં રાષ્ટ્રહિતને સર્વોચ્ચ પ્રાથમિકતા આપશે અને દેશના વિકાસમાં સક્રિય યોગદાન આપશે. સમારોહમાં અનેક મહાનુભાવો, જનપ્રતિનિધિઓ અને વિવિધ ક્ષેત્રોના અગ્રણીઓ હાજર રહ્યા હતા.

Reporter: admin