વડોદરા શહેરમાં અંદાજે એક પખવાડિયાના વિરામ બાદ ફરી વરસાદી માહોલ જોવા મળ્યો હતો. દિવસ દરમિયાન વાદળછાયા વાતાવરણ વચ્ચે શહેરના વિવિધ વિસ્તારોમાં હળવા વરસાદી ઝાપટાં પડતાં ગરમીથી લોકોને થોડા સમય માટે રાહત મળી હતી.

લાંબા વિરામ બાદ વરસેલા વરસાદને કારણે શહેરના અનેક માર્ગો ભીના બન્યા હતા. વરસાદ દરમિયાન વાહનચાલકોએ સાવચેતીપૂર્વક વાહનો હંકાર્યા હતા. જોકે વરસાદ બંધ થતાં જ ફરી સૂર્યપ્રકાશ નીકળતા ભેજનું પ્રમાણ વધી ગયું હતું અને બફારામાં વધારો થતાં લોકો ગરમી અને ભેજથી અકળાઈ ઉઠ્યા હતા.

ખાસ કરીને બપોરના સમયે બહાર નીકળતા લોકોને પરસેવાથી ભારે હાલાકીનો સામનો કરવો પડ્યો હતો. હવામાનમાં સતત થઈ રહેલા બદલાવને કારણે શહેરમાં એક તરફ વરસાદ અને બીજી તરફ બફારાની સ્થિતિ જોવા મળી રહી છે, જેના કારણે જનજીવન પણ પ્રભાવિત થયું છે.

હવામાન વિભાગના અનુમાન મુજબ આગામી દિવસોમાં પણ વડોદરા શહેરમાં છૂટાછવાયા વરસાદી ઝાપટાં પડવાની શક્યતા છે. સાથે જ વાતાવરણમાં ભેજનું પ્રમાણ ઊંચું રહેવાની અને હવામાનમાં અસ્થિરતા યથાવત્ રહેવાની સંભાવના વ્યક્ત કરવામાં આવી છે.

Reporter: admin