80મા સ્વતંત્રતા દિવસ નિમિત્તે લાલ કિલ્લાની પ્રાચીર પરથી રાષ્ટ્રને સંબોધિત કરતાં વડાપ્રધાન નરેન્દ્ર મોદીએ યુવાનો માટે મોટી જાહેરાતો કરી. તેમણે આગામી એક વર્ષમાં એક કરોડ યુવાનોને આર્ટિફિશિયલ ઇન્ટેલિજન્સ (AI)ની સ્કિલ ટ્રેનિંગ આપવાની જાહેરાત કરી. સાથે જ સ્પર્ધાત્મક પરીક્ષાઓની તૈયારી કરતા યુવાનો માટે મફત ઓનલાઈન કોચિંગ ઉપલબ્ધ કરાવવાની વાત કરી.

વડાપ્રધાને જણાવ્યું કે વિકસિત ભારતના નિર્માણમાં યુવાનોની ભૂમિકા સૌથી મહત્વપૂર્ણ રહેશે. તેમણે કહ્યું કે ભારતના યુવાનોમાં AI ક્ષેત્રે વિશ્વનું નેતૃત્વ કરવાની ક્ષમતા વિકસાવવી જોઈએ. આ હેતુથી એક વર્ષમાં એક કરોડ યુવાનોને AI સ્કિલ ટ્રેનિંગ આપવાનો સંકલ્પ લેવામાં આવ્યો છે.

સ્પર્ધાત્મક પરીક્ષાઓ માટે મફત કોચિંગ

પીએમ મોદીએ ગરીબ અને મધ્યમ વર્ગના પરિવારો પર ખાનગી કોચિંગના આર્થિક બોજનો પણ ઉલ્લેખ કર્યો. તેમણે કહ્યું કે સ્પર્ધાત્મક પરીક્ષાઓની તૈયારી માટે કોચિંગ ક્લાસ ઘણા પરિવારો માટે મોટો ખર્ચ બની ગયા છે. સરકાર આ આર્થિક બોજ ઘટાડવા માટે વિવિધ સ્પર્ધાત્મક પરીક્ષાઓ માટે મફત ઓનલાઈન કોચિંગ ઉપલબ્ધ કરાવશે.

યુવાનોને ‘દિમાગી નક્સલ’થી સાવચેત રહેવાની અપીલ

પીએમ મોદીએ યુવાનોને હિંસા અને અરાજકતા ફેલાવતી માનસિકતાથી દૂર રહેવાની સલાહ આપી. તેમણે કહ્યું કે યુવાનોએ આવા તત્વોને ઓળખીને તેમનાથી દૂર રહેવું પડશે.

Reporter: admin