ફીનિક્સ એર સ્પેસમાં અમેરિકન એરલાઇન્સના બે વિમાન એક જ ફ્લાઇટ નંબર 2482થી ઉડી રહ્યા હતા. બંને વિમાનો સામસામે આવવાની સ્થિતિ સર્જાતા ATCની સતર્કતાથી મોટો અકસ્માત ટળી ગયો.
અમેરિકાના ફીનિક્સ એર સ્પેસમાં વિમાન સુરક્ષા સાથે જોડાયેલી એક ચોંકાવનારી ઘટના સામે આવી છે. અહીં એક જ સમયે અમેરિકન એરલાઇન્સના બે પેસેન્જર વિમાન એક જ ફ્લાઇટ નંબર 2482 અને સમાન કોલ સાઇન સાથે આકાશમાં ઉડી રહ્યા હતા. થોડા સમય માટે બંને વિમાનો વચ્ચે ટક્કરનો ખતરો સર્જાયો હતો, પરંતુ એર ટ્રાફિક કંટ્રોલરની સતર્કતાથી મોટી દુર્ઘટના ટળી ગઈ.
મળતી માહિતી મુજબ, એક વિમાન શિકાગોથી ફીનિક્સ આવી રહ્યું હતું, જ્યારે બીજું વિમાન ફીનિક્સથી જ ઉડાન ભરી ચૂક્યું હતું. ખરાબ હવામાનના કારણે શિકાગોથી આવતી ફ્લાઇટમાં ઘણો વિલંબ થયો હતો. દરમિયાન એરલાઇને ફીનિક્સથી બીજી ફ્લાઇટ શરૂ કરવા માટે એક અન્ય વિમાન મોકલ્યું, પરંતુ તેનો ફ્લાઇટ નંબર બદલવામાં આવ્યો નહોતો.
એક જ ફ્લાઇટ નંબર અને કોલ સાઇન હોવાના કારણે બંને વિમાનોની ઓળખને લઈને મૂંઝવણ સર્જાઈ શકે તેમ હતી. ATCએ તાત્કાલિક બંને વિમાનોને અલગ-અલગ ઓળખીને સૂચનાઓ આપી. આવનારા વિમાનને વધુ ઊંચાઈ પર અને ઉડાન ભરી ચૂકેલા વિમાનને નીચે રાખવામાં આવ્યું, જેથી બંને વચ્ચે સુરક્ષિત અંતર જળવાઈ રહ્યું.
ઘટના બાદ એર ટ્રાફિક કંટ્રોલ ક્ષેત્રમાં લગભગ 25 વર્ષથી કામ કરી રહેલા નિષ્ણાતોએ પણ આ ઘટનાને અત્યંત અસામાન્ય ગણાવી હતી.
Reporter: admin
