ભારતનું મેડિકલ ડિવાઈસ બિઝનેસ આવનારા સમયમાં ખૂબ જ ઝડપથી આગળ વધવાનું છે. તેનો વિસ્તાર ૨૫૦ અબજ ડોલર સુધી પહોંચવાનું અનુમાન લગાવવામાં આવી રહ્યું છે. ફિક્કી-ડીયુએ કન્સલ્ટિંગ દ્વારા જારી કરવામાં આવેલા એક રિપોર્ટમાં જણાવવામાં આવ્યું છે કે આવનારા વર્ષોમાં ઝડપથી વિસ્તરણ કરીને આ ઉદ્યોગ વર્ષ ૨૦૪૭ સુધીમાં ૨૫૦ અબજ ડોલરના બજાર સુધી પહોંચી શકે છે.

FICCI સાથે મળીને શુક્રવારે, ૭ ઓગસ્ટના રોજ ડિપાર્ટમેન્ટ ઓફ ફાર્માસ્યુટિકલ્સ દ્વારા આયોજિત 'ઈન્ડિયા મેડિકલ ડિવાઈસ ૨૦૨૬'ના ૯મા એડિશનના ઉદ્ઘાટન સત્રમાં જારી કરાયેલા વ્હાઈટ પેપર મુજબ, હાલમાં લગભગ ૧૪ અબજ ડોલર મૂલ્ય ધરાવતો ભારતનો મેડિકલ ડિવાઈસ ઉદ્યોગ આ દાયકાના અંત સુધીમાં ૩૦-૫૦ અબજ ડોલર સુધી પહોંચી શકે છે, અને વર્ષ ૨૦૪૭ સુધીમાં તેનું કદ વધીને ૨૫૦ અબજ ડોલર થવાની સંભાવના છે.

ઝડપી વૃદ્ધિના મુખ્ય કારણો

રિપોર્ટમાં જણાવવામાં આવ્યું છે કે દેશમાં આરોગ્ય સેવાઓની વધતી જરૂરિયાત, અત્યાધુનિક તબીબી ટેકનોલોજીનો ઝડપી અપનાવ, સ્વદેશી મેન્યુફેક્ચરિંગને પ્રોત્સાહન આપતી સરકારી નીતિઓ તથા ભારતને વૈશ્વિક મેડટેક હબ બનાવવાની મહત્વાકાંક્ષા આ ક્ષેત્રની ઝડપી વૃદ્ધિના મુખ્ય કારણો હશે.

ઘરેલુ મેન્યુફેક્ચરિંગ ક્ષમતામાં વૃદ્ધિ

રિપોર્ટ મુજબ, ઉત્પાદન આધારિત પ્રોત્સાહન (PLI) યોજના અને મેડિકલ ડિવાઈસ બિઝનેસ સુદ્રઢીકરણ યોજના જેવી સરકારી પહેલોથી ઘરેલુ મેન્યુફેક્ચરિંગ ક્ષમતામાં ઘણો વધારો થયો છે. આ યોજનાઓએ ભારતની વૈશ્વિક સ્પર્ધાત્મક ક્ષમતાને પણ મજબૂત બનાવી છે. રિપોર્ટમાં એ વાત પર ભાર મૂકવામાં આવ્યો છે કે આ ઉદ્યોગની લાંબાગાળાની સફળતા ફક્ત ઉપકરણોના નિર્માણ પર જ નિર્ભર નહીં રહે, પરંતુ તબીબી ઉપકરણોની સર્વિસિંગ, જાળવણી, કેલિબ્રેશન અને સંપૂર્ણ લાઈફસાઈકલના મેનેજમેન્ટ માટે વિશ્વસ્તરીય વ્યવસ્થા વિકસાવવી પણ એટલી જ જરૂરી હશે.
રિપોર્ટમાં આગળ જણાવવામાં આવ્યું છે કે આધુનિક આરોગ્ય સેવાઓમાં તબીબી ઉપકરણો સમયસર રોગની ઓળખ, કટોકટીની સારવાર, શસ્ત્રક્રિયા અને અદ્યતન તબીબી સેવાઓની કરોડરજ્જુ બની ચૂક્યા છે, તેથી તેમની ખરીદીની સાથે-સાથે સંપૂર્ણ ઉપયોગ દરમિયાન વિશ્વસનીય જાળવણી સુનિશ્ચિત કરવી પણ ખૂબ જ મહત્વપૂર્ણ છે.

Reporter: admin