દક્ષિણ ચીન સમુદ્રને લઈને 2016ના આંતરરાષ્ટ્રીય મધ્યસ્થતા ટ્રિબ્યુનલના ઐતિહાસિક ચુકાદાની 10મી વર્ષગાંઠ નિમિત્તે જાપાન સહિત 14 દેશોએ ચીનના સમુદ્રી દાવાઓને નકારી કાઢતા સંયુક્ત નિવેદન જાહેર કર્યું છે. આ નિવેદન બાદ ચીને કડક પ્રતિક્રિયા આપતાં બેઇજિંગ સ્થિત જાપાનના વરિષ્ઠ રાજદ્વારી અધિકારીને તલબ કરીને સત્તાવાર વિરોધ નોંધાવ્યો છે.
અમેરિકા, જાપાન, ઓસ્ટ્રેલિયા, બ્રિટન, ફિલિપાઇન્સ, કેનેડા, જર્મની, ઇટાલી અને ન્યૂઝીલેન્ડ સહિત કુલ 14 દેશોએ જણાવ્યું કે 12 જુલાઈ, 2016ના રોજ દ હેગ સ્થિત સ્થાયી મધ્યસ્થતા ન્યાયાધિકરણ (PCA) દ્વારા અપાયેલો નિર્ણય અંતિમ અને કાનૂની રીતે બંધનકર્તા છે. નિવેદનમાં ચીનના 'નાઇન-ડેશ લાઇન' દાવાને સંયુક્ત રાષ્ટ્રના સમુદ્રી કાયદા (UNCLOS) હેઠળ કોઈ કાનૂની આધાર ન હોવાનું પણ સ્પષ્ટ કરવામાં આવ્યું.
ચીનના વિદેશ મંત્રાલયે જાપાન પર દક્ષિણ ચીન સમુદ્રના મુદ્દામાં બિનજરૂરી હસ્તક્ષેપ કરવાનો અને પ્રાદેશિક શાંતિ તથા સ્થિરતાને નુકસાન પહોંચાડવાનો આરોપ લગાવ્યો છે. ચીને જણાવ્યું કે જાપાન આ વિવાદનો પક્ષકાર નથી અને તેને આ મામલાથી દૂર રહેવું જોઈએ.
Reporter: admin
