એંદે: ઇન્ડોનેશિયાના ફ્લોરેસ ટાપુ નજીક શનિવારે સવારે 7.7ની તીવ્રતાનો શક્તિશાળી ભૂકંપ આવ્યો હતો. ભૂકંપના જોરદાર આંચકાથી અનેક ઇમારતો ધરાશાયી થઈ ગઈ હતી અને કાટમાળ નીચે દબાઈ જવાથી 20 લોકોનાં મોત થયાના અહેવાલ છે. અનેક લોકો ઘાયલ થયા હોવાની પણ માહિતી સામે આવી છે. રાહત અને બચાવ કામગીરી ચાલી રહી છે અને મૃતકોની સંખ્યા વધવાની આશંકા વ્યક્ત કરવામાં આવી રહી છે.

અમેરિકન જિયોલોજિકલ સર્વે (USGS) અનુસાર, ભૂકંપનું કેન્દ્ર ફ્લોરેસ ટાપુના ઉત્તરીય કિનારાથી આશરે 68 કિલોમીટર ઉત્તર-પશ્ચિમમાં આવેલા એંદે શહેર નજીક હતું. ભૂકંપની ઊંડાઈ માત્ર 10 કિલોમીટર હોવાનું જણાવાયું છે. ઓછી ઊંડાઈના કારણે ભૂકંપના આંચકા સપાટી પર ખૂબ જ શક્તિશાળી અનુભવાયા હતા.

ભૂકંપના આંચકા બાદ વિસ્તારમાં અફરાતફરીનો માહોલ સર્જાયો હતો અને લોકો પોતાના ઘરો તથા ઇમારતોમાંથી બહાર નીકળી સુરક્ષિત સ્થળો તરફ દોડી ગયા હતા. અનેક સ્થળોએ ઇમારતોને નુકસાન પહોંચ્યું હોવાના અહેવાલ છે. સ્થાનિક પ્રશાસન અને ઇમરજન્સી ટીમો અસરગ્રસ્ત વિસ્તારોમાં પહોંચી રાહત અને બચાવ કામગીરીમાં લાગી ગઈ છે.
પ્રારંભિક ભૂકંપ બાદ આ જ વિસ્તારમાં 5.6 અને 5.9ની તીવ્રતાના બે શક્તિશાળી આફ્ટરશોક પણ અનુભવાયા હતા. સતત આવી રહેલા આંચકાઓને કારણે લોકોમાં ભયનો માહોલ છે. પ્રશાસને લોકોને સાવચેત રહેવા અને સત્તાવાળાઓની સૂચનાઓનું પાલન કરવાની અપીલ કરી છે.

ઇન્ડોનેશિયાની હવામાનશાસ્ત્ર, જળવાયુશાસ્ત્ર અને ભૂભૌતિકશાસ્ત્ર એજન્સી (BMKG)એ ભૂકંપ બાદ સુનામીની સંભાવનાને લઈને ચેતવણી જાહેર કરી છે. દરિયાકાંઠાના વિસ્તારોમાં રહેતા લોકોને સુરક્ષિત સ્થળે ખસી જવા અને પ્રશાસનની સૂચનાઓનું પાલન કરવાની સલાહ આપવામાં આવી છે.
ફ્લોરેસ ટાપુ અને આસપાસનો વિસ્તાર ભૂકંપીય પ્રવૃત્તિની દૃષ્ટિએ સંવેદનશીલ માનવામાં આવે છે. અધિકારીઓએ અસરગ્રસ્ત વિસ્તારોમાં નુકસાનનું મૂલ્યાંકન શરૂ કરી દીધું છે. બચાવ ટીમો કાટમાળમાં ફસાયેલા લોકોને શોધી રહી છે, જ્યારે ઘાયલોને સ્થાનિક હોસ્પિટલોમાં ખસેડવામાં આવી રહ્યા છે.

Reporter: admin