વડોદરા શહેરના પરિવાર ચાર રસ્તાથી સવિતા હોસ્પિટલ તરફ જતા માર્ગ પર છેલ્લા અંદાજે એક મહિનાથી પડેલો ભૂવો હજુ સુધી યથાવત રહેતા રાહદારીઓ અને વાહનચાલકો માટે અકસ્માતનું ગંભીર જોખમ ઊભું થયું છે. સ્થાનિકોના જણાવ્યા મુજબ વારંવાર રજૂઆત કરવા છતાં સંબંધિત વિભાગ દ્વારા ભૂવો પૂરવાની કામગીરી હાથ ધરવામાં આવી નથી, જેના કારણે લોકોમાં ભારે અસંતોષ જોવા મળી રહ્યો છે.
શહેરમાં છેલ્લા કેટલાક સમયથી વિવિધ વિસ્તારોમાં ભૂવા પડવાની ઘટનાઓ સતત સામે આવી રહી છે. પાણીની લાઇન, ડ્રેનેજ અને વરસાદી ગટરના કામો બાદ યોગ્ય રીતે રોડનું પુનઃસ્થાપન (રિસ્ટોરેશન) ન થતાં વારંવાર રસ્તા બેસી જાય છે અને ભૂવા સર્જાય છે. ઉપરાંત પાણીની લાઇનમાં લીકેજ અને નબળી ગુણવત્તાની કામગીરીને કારણે પણ આવી સમસ્યાઓ વધી રહી હોવાનું સ્થાનિકોનું કહેવું છે.
Reporter: admin
