કોમનવેલ્થ ગેમ્સ 2026માં મહિલા શોટપુટ F57 સ્પર્ધામાં સ્વર્ણ પદક જીતનાર ભારતની પેરા એથ્લીટ શર્મિલા ધનખડની સફર સંઘર્ષોથી ભરેલી રહી છે. પોલિયો, ગરીબી, ઘરેલું હિંસા અને આર્થિક મુશ્કેલીઓનો સામનો કર્યા બાદ તેમણે આંતરરાષ્ટ્રીય મંચ પર ભારતનું નામ રોશન કર્યું છે.
હરિયાણાના મહેન્દ્રગઢ જિલ્લાના ચિત્રૌલી ગામમાં જન્મેલી શર્મિલાનું બાળપણ અભાવોમાં પસાર થયું હતું. તેમના પિતા નાના ખેડૂત હતા, જ્યારે માતા દૃષ્ટિહીન હતા. માત્ર બે વર્ષની ઉંમરે પોલિયોના કારણે તેમનો એક પગ પ્રભાવિત થયો હતો, પરંતુ તેમણે હિંમત હારી નહીં.
19 વર્ષની ઉંમરે થયેલા લગ્ન બાદ શર્મિલાને ઘરેલું હિંસાનો સામનો કરવો પડ્યો હતો. બે દીકરીઓ સાથે તેઓ પિયરમાં પરત ફર્યા અને પરિવારના ભરણપોષણ માટે સફાઈ કામદાર, ઘરેલું સહાયક અને સુરક્ષા ગાર્ડ તરીકે કામ કર્યું.

બીજી લગ્ન બાદ બદલાઈ જિંદગી

28 વર્ષની ઉંમરે થયેલા બીજા લગ્ન બાદ પતિ અજીત સિંહે તેમને રમતગમતમાં આગળ વધવા પ્રોત્સાહન આપ્યું. 34 વર્ષની ઉંમરે તેમણે પેરા એથ્લેટિક્સની તાલીમ શરૂ કરી અને કોચ ટેકચંદ તથા દેવેન્દ્રના માર્ગદર્શન હેઠળ સફળતાની શરૂઆત કરી.
2021માં પેરા નેશનલ ચેમ્પિયનશિપમાં રાષ્ટ્રીય રેકોર્ડ સાથે સ્વર્ણ જીત્યા બાદ તેમણે પોતાની ઓળખ બનાવી. રમત માટે આર્થિક મુશ્કેલીઓ વચ્ચે 2023માં પરિવારે રેવાડી સ્થિત ઘર વેચીને તેમની તાલીમ અને સ્પર્ધાઓનો ખર્ચ ઉઠાવ્યો.

9.81 મીટરના થ્રોથી રચાયો ઈતિહાસ

ગ્લાસ્ગોમાં યોજાયેલી કોમનવેલ્થ ગેમ્સમાં 40 વર્ષીય શર્મિલા ધનખડે 9.81 મીટરનો થ્રો ફેંકીને મહિલા શોટપુટ F57માં ગોલ્ડ મેડલ જીત્યો હતો. આ સાથે તેઓ કોમનવેલ્થ ગેમ્સના ઇતિહાસમાં પેરા એથ્લેટિક્સમાં ભારત માટે સ્વર્ણ જીતનાર પ્રથમ ખેલાડી બની ગયા.
2022 કોમનવેલ્થ ગેમ્સમાં ચોથા સ્થાને રહેલી અને અગાઉ અનેક વખત પદકથી ચુકેલી શર્મિલાએ હારને પ્રેરણા બનાવી અને અંતે દેશ માટે ઐતિહાસિક સિદ્ધિ હાંસલ કરી.

Reporter: admin