શ્રીલંકા સામેની બે ટેસ્ટ મેચની સિરીઝ માટે ભારતીય ટીમની જાહેરાત કરવામાં આવી છે. ટીમમાં કેટલાક નવા ચહેરાઓને તક આપવામાં આવી છે, જ્યારે કેટલાક યુવા ખેલાડીઓ પર ફરી વિશ્વાસ વ્યક્ત કરવામાં આવ્યો છે. જોકે ઘરેલુ ક્રિકેટમાં સતત ઉત્તમ પ્રદર્શન છતાં પાંચ ખેલાડીઓને ફરી એકવાર પસંદગીથી વંચિત રાખવામાં આવતા ક્રિકેટ વર્તુળોમાં ચર્ચા શરૂ થઈ છે.
જમ્મુ-કાશ્મીરને રણજી ટ્રોફી ચેમ્પિયન બનાવવામાં મહત્વની ભૂમિકા ભજવનાર ઝડપી બોલર આકિબ નબીને ફરી નિરાશા મળી છે. 2025-26ની રણજી ટ્રોફીમાં તેણે સૌથી વધુ 60 વિકેટ ઝડપી હોવા છતાં તેનું નામ ટીમમાં સામેલ કરવામાં આવ્યું નથી.
મિડલ ઓર્ડરના અનુભવી બેટ્સમેન સરફરાઝ અહમદને પણ પસંદગીકારોએ અવગણ્યા છે. ભારત માટે ટેસ્ટ ક્રિકેટમાં રમી ચૂકેલા સરફરાઝ તાજેતરના ઘરેલુ પ્રદર્શનમાં સતત સફળ રહ્યા હોવા છતાં તેમને ફરી તક મળી નથી.
નંબર-3ના બેટ્સમેનની શોધ વચ્ચે ઋતુરાજ ગાયકવાડને પણ સ્થાન મળ્યું નથી. ચેતેશ્વર પુજારા બાદ ભારત આ સ્થાન માટે સ્થિર વિકલ્પ શોધી રહ્યું છે, છતાં ઋતુરાજ પર પસંદગીકારોએ વિશ્વાસ વ્યક્ત કર્યો નથી.
અનુભવી ઝડપી બોલર મોહમ્મદ શમી પણ ટીમની બહાર રહ્યા છે. ફિટનેસ અને ફોર્મ બંનેમાં સફળતાપૂર્વક વાપસી કર્યા બાદ પણ તેમને શ્રીલંકા પ્રવાસ માટે પસંદ કરવામાં આવ્યા નથી. જસપ્રીત બુમરાહની ઉપલબ્ધતા ફિટનેસ ટેસ્ટ પર નિર્ભર હોવા છતાં શમીને તક ન મળતાં સવાલો ઊભા થયા છે.
મિડલ ઓર્ડરના બેટ્સમેન રજત પાટીદાર પણ પસંદગીકારોની અવગણનાનો ભોગ બન્યા છે. વર્ષ 2024માં ઇંગ્લેન્ડ સામે ટેસ્ટ ડેબ્યૂ કરનાર પાટીદારને ત્યારથી સતત ટીમ બહાર રાખવામાં આવ્યા છે, જ્યારે સ્પિન સામે તેમની બેટિંગને મજબૂત માનવામાં આવે છે.
શ્રીલંકા સામેની ટેસ્ટ સિરીઝ માટે ટીમની જાહેરાત બાદ આ પાંચ ખેલાડીઓને ફરી તક ન મળતાં પસંદગી સમિતિના નિર્ણય પર ક્રિકેટપ્રેમીઓ અને નિષ્ણાતોમાં ચર્ચા તેજ બની છે.
Reporter: admin
