વડાપ્રધાન નરેન્દ્ર મોદીએ યુવાનોને આત્મકથાઓ વાંચવા અને અન્ય લોકોના સંઘર્ષમાંથી શીખવાની અપીલ કરી છે. પૂર્વ રાષ્ટ્રપતિ રામનાથ કોવિંદની આત્મકથા **‘ટ્રાયમ્ફ ઓફ ધ ઇન્ડિયન રિપબ્લિક: માય લાઇફ, માય સ્ટ્રગલ્સ’**ના વિમોચન કાર્યક્રમને સંબોધતા PM મોદીએ કહ્યું કે આજના ‘રીલ યુગ’માં યુવાનોએ શોર્ટકટથી દૂર રહેવું જોઈએ, કારણ કે સરળ રસ્તો ઘણી વખત નુકસાનકારક સાબિત થઈ શકે છે.
PM મોદીએ કહ્યું કે રામનાથ કોવિંદનું જીવન સંઘર્ષ, દૃઢ સંકલ્પ અને સફળતાનું ઉદાહરણ છે. તેમનું જીવન દર્શાવે છે કે મુશ્કેલ પરિસ્થિતિઓ છતાં મજબૂત ઇચ્છાશક્તિના આધારે વ્યક્તિ જીવનમાં મોટી ઊંચાઈઓ હાંસલ કરી શકે છે અને દેશના સર્વોચ્ચ બંધારણીય પદ સુધી પહોંચી શકે છે.
વડાપ્રધાને રાષ્ટ્રપતિ પદ છોડ્યા બાદ પણ જાહેર જીવનમાં સક્રિય રહેવા બદલ રામનાથ કોવિંદની પ્રશંસા કરી. તેમણે કહ્યું કે પૂર્વ રાષ્ટ્રપતિ ‘એક રાષ્ટ્ર, એક ચૂંટણી’ પહેલ પર કામ કરી રહ્યા છે, જે ભારતીય લોકશાહીને વધુ મજબૂત બનાવવામાં મહત્વપૂર્ણ યોગદાન આપી શકે છે.
PM મોદીએ યુવાનોને આત્મકથાઓ વાંચવાની અપીલ કરતાં કહ્યું કે તેનાથી ઇતિહાસ અને સમાજને એવા લોકોના અનુભવો દ્વારા સમજવાની તક મળે છે, જેમણે તે સમયગાળાને પોતે અનુભવ્યો હોય.
Reporter: admin
