લાહૌલ-સ્પીતીના પાંગી–ઉદયપુર માર્ગ પર પહાડનો મોટો ભાગ ધસી પડતાં ટાટા સ્યૂમો કાટમાળ નીચે દબાઈ ગઈ. ઘટનામાં 13 લોકોના મોત થયા હોવાનું પ્રાથમિક માહિતીમાં સામે આવ્યું છે, જ્યારે બે લોકો ઘાયલ થયા છે. પોલીસ અને બચાવ દળ સ્થળ પર પહોંચી રાહત કામગીરી ચલાવી રહ્યા છે.
હિમાચલ પ્રદેશના લાહૌલ-સ્પીતી જિલ્લામાં પાંગી–ઉદયપુર માર્ગ પર શુક્રવારે ગંભીર અકસ્માત સર્જાયો હતો. કુડૂ નાળા નજીક ચાલતી ટાટા સ્યૂમો પર અચાનક પહાડ પરથી વિશાળ ચટ્ટાનો અને કાટમાળ તૂટી પડતાં વાહન સંપૂર્ણપણે દબાઈ ગયું. પ્રાથમિક માહિતી મુજબ આ દુર્ઘટનામાં 13 લોકોના મોત થયા છે અને બે લોકો ઘાયલ થયા છે.
માહિતી અનુસાર, દુર્ઘટનાનો ભોગ બનેલા તમામ લોકો ચંબા જિલ્લાના રહેવાસી હતા અને ફરવા ગયા બાદ પરત ફરી રહ્યા હતા. એક દિવસ પહેલાં ભારે ભૂસ્ખલનને કારણે ઉદયપુર–કિલાડ માર્ગ બંધ હતો, જેના કારણે તમામ મુસાફરો તિન્દીમાં રોકાયા હતા. માર્ગ ફરી શરૂ થતાં જ તેઓ આગળ નીકળ્યા, પરંતુ કુડૂ નાળા નજીક પહાડનો મોટો ભાગ ધસી પડતાં અકસ્માત સર્જાયો.
ઘટનાની જાણ થતાં જ લાહૌલ-સ્પીતી પોલીસ, સ્થાનિક પ્રશાસન અને બચાવ દળ તાત્કાલિક સ્થળ પર પહોંચ્યા હતા. કાટમાળમાંથી એક ઘાયલ વ્યક્તિને સુરક્ષિત બહાર કાઢીને સારવાર માટે હોસ્પિટલમાં ખસેડવામાં આવ્યો છે, જ્યારે અન્ય લોકોને શોધવા માટે રેસ્ક્યૂ ઓપરેશન યુદ્ધના ધોરણે ચાલુ છે.
ભરમૌરના ધારાસભ્ય જનક રાજે જણાવ્યું કે બંને જિલ્લાના પ્રશાસનને રાહત કામગીરી ઝડપી બનાવવા સૂચના આપવામાં આવી છે. પ્રશાસનનું કહેવું છે કે બચાવ અભિયાન પૂર્ણ થયા બાદ જ મૃત્યુઆંક અને અન્ય વિગતો અંગે સત્તાવાર માહિતી જાહેર કરવામાં આવશે.
Reporter: admin
