કચ્છના ઔદ્યોગિક, વેપારી અને પ્રવાસન ક્ષેત્ર માટે મંગળવારનો દિવસ ઐતિહાસિક સાબિત થયો છે. અદાણી ગ્રુપના મુંદ્રા એરપોર્ટ પરથી પ્રથમ વખત નિર્ધારિત વ્યાવસાયિક ઉડાન સેવાઓનો પ્રારંભ થયો છે, જેના કારણે ભુજ અને કંડલા બાદ કચ્છને વધુ એક મહત્વપૂર્ણ હવાઈ કનેક્ટિવિટી કેન્દ્ર મળ્યું છે. સ્ટાર એર સાથેની ભાગીદારીમાં શરૂ થયેલી આ સેવાઓ દ્વારા મુંદ્રાને મુંબઈ અને ગોવા સહિત કુલ 8 શહેરો સાથે જોડવામાં આવ્યું છે, જે કચ્છના આર્થિક નકશામાં મોટો ફેરફાર લાવનાર પગલું માનવામાં આવી રહ્યું છે.
મુંદ્રા એરપોર્ટથી સીધી અથવા વન-સ્ટોપ કનેક્ટિવિટી દ્વારા હવે મુંબઈ, ગોવા, હિંડન (દિલ્હી-એનસીઆર), સુરત, બેલગાવી, બેંગલુરુ, કોલ્હાપુર અને નાંદેડ જેવા શહેરો સાથે હવાઈ જોડાણ ઉપલબ્ધ બનશે. સ્ટાર એરના આ નવા રૂટ્સથી વેપારીઓ, ઉદ્યોગકારો, લોજિસ્ટિક્સ ઓપરેટરો અને પ્રવાસીઓ માટે મુસાફરીનો સમય નોંધપાત્ર રીતે ઘટશે. ખાસ કરીને દેશના સૌથી મોટા ખાનગી બંદર ગણાતા મુંદ્રા પોર્ટ અને મુંદ્રા એસઈઝેડ સાથે જોડાયેલા વ્યવસાયોને આ કનેક્ટિવિટી સીધો ફાયદો પહોંચાડશે.
અદાણી ગ્રુપના જણાવ્યા મુજબ મુંદ્રા એરપોર્ટને એક મલ્ટી-મોડલ લોજિસ્ટિક્સ અને બિઝનેસ હબ તરીકે વિકસાવવાની દિશામાં આ મહત્વપૂર્ણ પગલું છે. એરપોર્ટ પર 1900 મીટરનો રનવે, આધુનિક ટર્મિનલ, ચેક-ઇન કાઉન્ટર્સ, પેસેન્જર લાઉન્જ, ફૂડ કોર્ટ, પાર્કિંગ અને વ્હીલચેર સુવિધા જેવી વ્યવસ્થાઓ ઊભી કરવામાં આવી છે. કંપનીનો દાવો છે કે હવાઈ સેવાઓ શરૂ થતાં મુંદ્રા પોર્ટ, ઔદ્યોગિક ઝોન અને કચ્છના પ્રવાસન ક્ષેત્ર વચ્ચે વધુ મજબૂત સંકલન ઉભું થશે.
કચ્છ માટે આ વિકાસ માત્ર મુસાફરીની નવી સુવિધા નથી, પરંતુ રોજગાર, રોકાણ, વેપાર અને ટૂરિઝમ માટે પણ નવા દ્વાર ખોલે છે. સફેદ રણ, દરિયાકાંઠાના વિસ્તારો અને ઔદ્યોગિક વિકાસ માટે જાણીતા કચ્છને હવે દેશના મોટા શહેરો સાથે વધુ ઝડપી જોડાણ મળતા સ્થાનિક અર્થતંત્રને નવી ગતિ મળવાની આશા વ્યક્ત કરવામાં આવી રહી છે. વેપાર જગતમાં આ એરપોર્ટને “કચ્છ માટેનું એક્સપ્રેસ કોરિડોર” તરીકે પણ જોવામાં આવી રહ્યું છે.
Reporter: admin
