થાઈલેન્ડની રાજધાની બેન્કોક નજીક શુક્રવારે એક હાઈસ્કૂલમાં ધોરણ-9ના વિદ્યાર્થીએ કથિત રીતે અંધાધૂંધ ફાયરિંગ કરતાં ખળભળાટ મચી ગયો હતો. આ હુમલામાં 3 શિક્ષકો અને 3 વિદ્યાર્થીઓ સહિત કુલ 6 લોકોનાં મોત થયા છે, જ્યારે 15 લોકો ઈજાગ્રસ્ત થયા હોવાનું સામે આવ્યું છે. ઈજાગ્રસ્તોમાંથી બેની હાલત ગંભીર હોવાનું જણાવાઈ રહ્યું છે.

પોલીસના જણાવ્યા મુજબ, આ ઘટના નોન્થાબુરી પ્રાંતમાં આવેલી ડેબસિરીન નોન્થાબુરી સ્કૂલમાં બની હતી. પ્રાથમિક તપાસમાં એક ચોંકાવનારો ખુલાસો થયો છે. પોલીસના જણાવ્યા પ્રમાણે, સ્કૂલ પહોંચતા પહેલા આરોપી વિદ્યાર્થીએ પોતાના ઘરે દાદા-દાદીની કથિત રીતે હત્યા કરી હતી. ત્યારબાદ ઘરમાંથી બંનેના મૃતદેહ મળી આવ્યા હતા.

તપાસ દરમિયાન જાણવા મળ્યું છે કે સ્કૂલમાં ફાયરિંગ માટે ઉપયોગમાં લેવાયેલી 9 એમએમની પિસ્તોલ આરોપીના દાદાની હતી, જે પોતે શિક્ષક હતા. હવે પોલીસ તપાસ કરી રહી છે કે આ હથિયાર વિદ્યાર્થીના હાથમાં કેવી રીતે આવ્યું અને તેણે આ ગંભીર ઘટનાને અંજામ શા માટે આપ્યો.

ફાયરિંગ બાદ સ્કૂલમાં અફરાતફરીનો માહોલ સર્જાયો હતો. ઘટનામાં આરોપી વિદ્યાર્થી પણ ગંભીર રીતે ઈજાગ્રસ્ત થયો હતો, જેને સારવાર માટે હોસ્પિટલમાં દાખલ કરવામાં આવ્યો છે. પોલીસ તેની સ્થિતિ પર નજર રાખી રહી છે અને સમગ્ર ઘટનાની તપાસ કરી રહી છે.

પોલીસ એ પણ તપાસ કરી રહી છે કે વિદ્યાર્થીએ પોતાના દાદા-દાદીની હત્યા શા માટે કરી અને ત્યારબાદ સ્કૂલમાં ફાયરિંગ કરવા પાછળ તેનું કારણ શું હતું. ઘટનાને પગલે સ્કૂલની સુરક્ષા વ્યવસ્થાને લઈને પણ અનેક સવાલો ઊભા થયા છે.

થાઈલેન્ડના વડાપ્રધાને ઘટનાને લઈને દુઃખ વ્યક્ત કર્યું છે. તેમણે ઘાયલોને યોગ્ય સારવાર મળી રહે અને મૃતકોના પરિવારજનોને શક્ય તમામ મદદ પૂરી પાડવામાં આવે તે માટે અધિકારીઓને જરૂરી સૂચનાઓ આપી છે.

Reporter: admin