કારેલીબાગ વિસ્તારમાં હોબાળો, આરોપીને છોડતા રહીશોમાં રોષ; પોલીસ મથકમાં ફરિયાદ નોંધાઈ

વૈકુંઠ એપાર્ટમેન્ટ ખાતે પાર્કિંગ મુદ્દે થયેલી તકરાર બાદ પોલીસ કાર્યવાહી સામે રોષ વ્યક્ત કરતા રહીશો
વડોદરા શહેરના કારેલીબાગ વિસ્તારમાં આવેલ બુડા સર્કલ નજીક વૈકુંઠ એપાર્ટમેન્ટમાં પાર્કિંગ મુદ્દે થયેલી તકરારે ઉગ્ર સ્વરૂપ ધારણ કરતા ભારે હોબાળો મચ્યો હતો. ઘટનાને પગલે સ્થળ પર પહોંચેલી કારેલીબાગ પોલીસની કામગીરી પર સ્થાનિક રહીશોએ ગંભીર સવાલો ઉઠાવ્યા છે.મળતી માહિતી અનુસાર, એપાર્ટમેન્ટમાં પાર્કિંગ બાબતે રહીશો અને કિરીટ મકવાણા નામના વ્યક્તિ વચ્ચે બોલાચાલી શરૂ થઈ હતી. રોજબરોજ થતા વિવાદોના કારણે પરિસ્થિતિ તંગ બની ગઈ હતી. રહીશોનો આક્ષેપ છે કે કિરીટ મકવાણા અવારનવાર આવી રીતે તકરાર ઉભી કરે છે, જેના કારણે એપાર્ટમેન્ટમાં શાંતિભંગ થાય છે.

વિવાદ વધતા રહીશોએ તાત્કાલિક પોલીસને જાણ કરી હતી. ઘટનાની માહિતી મળતા કારેલીબાગ પોલીસ મથકની ટીમ સ્થળ પર પહોંચી હતી. જોકે, રહીશોના જણાવ્યા પ્રમાણે, પોલીસ કર્મચારીએ બંને પક્ષની વાત સાંભળવાને બદલે કિરીટ મકવાણાને ત્યાંથી જવા દીધો હતો. જેના કારણે હાજર લોકોમાં રોષ ફાટી નીકળ્યો હતો.સ્થાનિક રહીશોએ વધુમાં આક્ષેપ કર્યો હતો કે કિરીટ મકવાણા નશાની હાલતમાં હતો, છતાં પોલીસે તેની અટકાયત કરવાની કોઈ કાર્યવાહી કરી નહોતી. આ ઘટના બાદ રહીશોએ પોલીસ સામે જ ઘેરાવો કરીને ન્યાયની માંગ કરી હતી. “જો કોઈ વ્યક્તિ વારંવાર તંગ કરે છે અને નશાની હાલતમાં હોબાળો કરે છે, તો તેની સામે કાયદેસર કાર્યવાહી થવી જોઈએ,” તેવી માંગ રહેવાસીઓએ કરી હતી.પરિસ્થિતિ વધુ બગડે તે પહેલાં પોલીસ ટીમે મામલો શાંત કરવાનો પ્રયાસ કર્યો હતો. જોકે, આ ઘટનાથી નારાજ રહીશો બાદમાં કારેલીબાગ પોલીસ મથક પહોંચ્યા હતા અને કિરીટ મકવાણા સામે સત્તાવાર ફરિયાદ નોંધાવી હતી.આ સમગ્ર ઘટનાએ પોલીસની કામગીરી અને નિષ્પક્ષતા અંગે સવાલો ઉભા કર્યા છે. રહીશો માંગ કરી રહ્યા છે કે આ મામલે યોગ્ય તપાસ કરવામાં આવે અને જો કોઈ પોલીસ કર્મચારી દ્વારા બેદરકારી દાખવાઈ હોય તો તેની સામે પણ જરૂરી કાર્યવાહી કરવામાં આવે.હાલમાં પોલીસે ફરિયાદના આધારે વધુ તપાસ હાથ ધરી હોવાનું જાણવા મળ્યું છે. હવે જોવાનું રહ્યું કે આ મામલે આગળ શું પગલાં લેવામાં આવે છે અને રહીશોને ન્યાય મળે છે કે નહીં.

Reporter: admin