આ પાર્ટીમાં કેટલાક ભ્રષ્ટ- નિવૃત્ત થયેલા વિવાદીત અધિકારીઓ પણ હાજર હતા..
દીલિપ રાણાનો વિવાદિત કાર્યકાળ અને અતાપી વન્ડર થીમ પાર્કની ફાઇલ ગુમ...
અતાપી ફાઇલ ચોરી અને શંકાસ્પદ ફેરવેલ પાર્ટી: અધિકારીઓની હાજરી અને હિસાબ-કિતાબની ચર્ચાઓ..
પૂર્વ કમિશનર દિલીપ રાણાએ પોતાના બંગલાના ગાર્ડનમાં યોજેલી પોતાની જ ફેરવેલી પાર્ટીનું અતાપીની લાપતા ફાઇલ સાથે કોઇ કનેક્શન ખરુ...? પોલીસે તપાસ કરવી જરુરી.

વડોદરામાં પોતાના કારનામાના કારણે બદનામ થયેલા પૂર્વ કમિશનર દિલીપ રાણાએ છોડતાં પણ મોટો કાંડ કર્યો? તેમના કાર્યકાળ દરમિયાન વિવાદિત અતાપી વન્ડર થીમ પાર્કની ફાઇલ કેમ્પ ઓફિસમાંથી ચોરી ગઈ છે, અને આ ફાઇલ લાવવા માટે જ દિલીપ રાણાએ પાર્કસ એન્ડ ગાર્ડન ખાતાના અધિકારીઓને જણાવ્યું હતું. જયારે તેમની વડોદરાથી બદલી કરવામાં આવી, ત્યારબાદ તેમણે ફેરવેલ પાર્ટી યોજી હતી. જેમાં કેટલાક શંકાસ્પદ શખ્સો, કોન્ટ્રાક્ટરો અને પૂર્વ અધિકારીઓ હાજર રહ્યા હતા.તે સમયે આ ફેરવેલ પાર્ટી અને તેની સત્યતા અંગે અહેવાલ પ્રકાશિત કર્યો હતો. ત્યારબાદ પણ જયારે આ વિવાદાસ્પદ ફાઇલની ચોરી થઇ અને પોલીસ તપાસ ચાલી રહી છે, ત્યારે પોલીસને યાદ કરાવવું જોઈએ કે રાણાએ પોતાના બંગલાના ગાર્ડનમાં આ ફેરવેલ પાર્ટી કરી હતી, જેમાં શંકાસ્પદ શખ્સો સાથે સાથે નિવૃત્ત અને વીઆરએસ લીધેલા અધિકારીઓ પણ ઉપસ્થિત રહ્યા હતા. આ અધિકારીઓની ગૂફ્તગુ દરમિયાન આર્થિક વ્યવહારોની ચર્ચા થઇ હતી. આ પાર્ટી દરમિયાન જ ફાઇલ ચોરીની શક્યતા પણ છે.ફેરવેલ પાર્ટીમાં રાણાએ કોર્પોરેશનના ભાગબટાઈવાળા અધિકારીઓને આમંત્રણ આપ્યું હતું. કેટલાક રોજબરોજના કર્મચારીઓ ઉપરાંત ભાગબટાઈવાળા અને નિવૃત્ત અધિકારીઓ પણ હાજર રહ્યા હતા.  રાણાએ 2 વર્ષ દરમિયાન મોટા ભાગનું કાર્ય કેમ્પ ઓફિસમાંથી જ પરિચલિત કર્યું હતું, જ્યાં સંબંધિત અધિકારીઓ અને કોન્ટ્રાક્ટરોની ખાસ તાલમેળ હતી. આ દરમિયાન કરોડોની ઉથલપાથલ થતી રહી તે ચર્ચાસ્પદ છે.

અતાપીની લાપતા ફાઇલ મામલે અતાપીની મદદ કરનારા નેતા કોણ છે?
અતાપીની લાપતા ફાઇલ મામલે ઉલ્લેખિત નેતા અને પીઠબળ શું છે તે પ્રશ્ન વડોદરા શહેરમાં ચર્ચા સર્જી રહ્યો છે. કોઈ નેતા વગર અતાપીની ફાઇલ ચોરી થવી શક્ય નથી. રાજકીય પીઠબળ વિના અતાપીને આટલો મોટો કોન્ટ્રાક્ટ મળવો પણ ગળે ઉતરતો નથી. ફાઇલ કોણે અને કેવી રીતે ગુમ કરી, તે અંગે પોલીસ પાસે કોઈ નક્કર માહિતી મળે તેમ લાગતું નથી.

અતાપીમાં હોટલ, ટેન્ટ સિટી અને પાર્ટી પ્લોટ કોની મંજૂરીથી ચાલે છે?
અતાપીમાં હોટલ, ટેન્ટ સિટી અને પાર્ટી પ્લોટ બનાવવાની વાતો હતી, પરંતુ ખરેખર હોટલ, ટેન્ટ સિટી કે પાર્ટી પ્લોટ ત્યાં બને છે કે નહીં તેની ચકાસણી કોર્પોરેશનને કરાવી જ નથી. અથવા તો કરીને રાજકીય દબાણથી આંખ આડા કાન કર્યા હોય. પરંતુ તપાસ કરવી જરૂરી છે કે અતાપીમાં હોટલ, ટેન્ટ સિટી અને પાર્ટી પ્લોટ કોની મંજૂરીથી ચાલે છે.

પૂર્વ ડેપ્યુટી કમિશનરે દિવાળી રજાઓમાં અતાપી શરૂ કરવા ઉતાવળે બેઠક કરી હતી..
વડોદરા શહેરમાં અગાઉનાં ડેપ્યુટી કમિશનર તરીકે ફરજ બજાવતા આ આઇએએસ અધિકારીએ 2023ના સમયગાળામાં, દિવાળી રજાઓ હોવા છતાં, અતાપી શરૂ કરવા બાબતે કોર્પોરેશનના કેટલાક અધિકારીઓ સાથે બેઠક કરી હતી. આ ઉચ્ચ અધિકારીએ અતાપી સત્વરે શરૂ કરવા માટે બેઠક કેમ કરી તે એક મોટો પ્રશ્ન છે. તેમણે કમિટીનું ગઠન પણ કર્યું હતું અને અધિકારીઓને સૂચના આપી હતી કે તત્કાળ અતાપી શરૂ કરવા માટે તમારા અભિપ્રાય આપો. આ મામલે પણ તપાસ જરૂરી છે. ત્યારબાદ આ અધિકારીની બદલી કરવામાં આવી હતી.હાલમાં તે એક જિલ્લાનાં કલેક્ટર તરીકે ફરજ બજાવી રહ્યા છે.

Reporter: admin